
遍知贝玛嘎波大师教言集PK64བླ་མ་མཆོད་པའི་ལྷན་ཐབས་དབང་ཆོག་དང་བཅས་པ་བཞུགས་སོ།།
10-134
༄༅། །བླ་མ་མཆོད་པའི་ལྷན་ཐབས་དབང་ཆོག་དང་བཅས་པ་བཞུགས་སོ།།
༄༅། །བླ་མ་མཆོད་པའི་ལྷན་ཐབས་དབང་ཆོག་དང་བཅས་པ་
བཞུགས་སོ། ། ༄༅། །ཐོས་ཚེ་ཡིད་དགའ་མཐོང་ན་ལྟ་བྲོད་པ། །བཏུད་ཀྱིན་ཡི་ཁ་རྫོགས་པའི་རྗེ་བཅུན་ཞབས། །ཡོངས་འདུའི་དཔལ་ལམ་བསམ་འཕེལ་ནོར་བུའི་མཐུ། །ཇི་བཞིན་ལྷམ་མེར་ངོམ་ལ་ཕྱག་འཚལ་ལོ། །ཞལ་
སྒོར་མ་ལུས་རྒྱུད་སྡེའི་གསང་ཚིག་རྣམས། །འདབ་བརྒྱའི་ངོས་ལ་སྦྲང་རྩི་ལྟར་ཆགས་པ། །བུང་བ་བཞིན་དུ་མྱང་ལ་གྲུབ་རིགས་ཀུན། །བསོད་ནམས་ཆེན་པོའི་མཁའ་ལ་ཐོགས་མེད་ལྡིང་།། འདིར་རྗེ་བཙུན་བླ་མ་
དམ་པ་མཆོད་པའི་ཆོ་ག་རྒྱས་པ་ལ་འཇུག་པར་འདོད་པས་ཐོག་མར། རྣལ་འབྱོར་གྱི་ཡོ་བྱད་ཀུན་བསགས་ཏེ་བདེ་བའི་སྟན་ལ་འདུག་ནས། མ་ནམ་མཁའ་དང་མཉམ་པའི་སེམས་ཅན་ཐམས་ཅད་བླ་
མ་སངས་རྒྱས་ཆོས་ཀྱི་སྐུ་ལ་སྐྱབས་སུ་མཆིའོ། །བླ་མ་ལོངས་སྤྱོད་རྫོགས་པའི་སྐུ་ལ་སྐྱབས་སུ་མཆིའོ། །བླ་མ་ཐུགས་རྗེ་སྤྲུལ་པའི་སྐུ་ལ་སྐྱབས་སུ་མཆིའོ། མ་ནམ་མཁའ་དང་མཉམ་པའི་སེམས་ཅན་
ཐམས་ཅད་བླ་མ་སངས་རྒྱས་རིན་པོ་ཆེ་ལ་སྐྱབས་སུ་མཆིའོ།། ཞེས་གསུམ་སོགས་ཇི་ལྟར་རིགས་པ་བཟླས་ནས། སེམས་ཅན་ཐམས་ཅད་མི་བཟད་པའི་སྡུག་བསྔལ་དང་བྲལ་ནས་མི་གནས་པའི་མྱ་ངན་ལས་འདས་པ་ལ་དགོད་པའི་ཕྱིར། 
10-135
བླ་མ་རྡོ་རྗེ་སེམས་དཔའི་སྒྲུབ་པ་ལ་འཇུག་པར་བྱའོ་སྙམ་དུ་སྨོན་པ་དང་། འཇུག་པའི་སེམས་བསྐྱེད་པ་འདི་ལྟར་དུ་བྱ་ཏེ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་
གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །བདེ་སྡུག་གི་རྒྱུ་ཆགས་སྡང་ཉེ་རིང་དང་བྲལ་བའི་བཏང་སྙོམས་ཆེན་
པོ་ལ་ཡུན་རིང་དུ་གནས་པར་གྱུར་ཅིག།ཅེས་ཚངས་པའི་གནས་པ་ཡིད་དང་འདྲེ་བར་བསྒོམས་ནས་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། སྟོང་པ་ཉིད་ཨེ་ཡིག་གི་རང་བཞིན་ཡོངས་སུ་གྱུར་
པའི་ཆོས་འབྱུང་འབྱུང་བ་རིམ་བརྩེགས་རི་རབ་པདྨ་རྭ་གུར་དང་བཅས་པའི་སྣ་ཚོགས་རྡོ་རྗེའི་གཞིར། ཡེ་ཤེས་ལྔའི་རང་བཞིན་གྱི་གཞལ་ཡས་ཁང་གྲུ་བཞི་སྒོ་བཞི་རྟ་བབས་བཞི་དང་ལྡན་པ། འདོད་
སྣམ། ཕ་གུ་དྲ་བ་དྲ་ཕྱེད། ཤར་བུ། བྱ་འདབ། པུ་ཤུ། དབུས་འཕྱུར་བུ་རིན་པོ་ཆེའི་ཏོག་གིས་བརྒྱན་པ་པདྨ་ལ་གནས་པའི་ཆོས་ཀྱི་འཁོར་ལོ་རི་དྭགས་གདུགས་ལ་སོགས་པས་སྤྲས་པའི་ནང་
སྣ་ཚོགས་པདྨ་འདབ་མ་ལྔ་པའི་ལྟེ་བ་ལ་སེང་གེ་ཆེན་པོ་བརྒྱད་ཀྱིས་བཏེག་པའི་རིན་པོ་ཆེའི་ཁྲི་པདྨ་ཟླ་ཉི་བརྩེགས་པའི་གདན་ལ། རང་གི་སེམས་རྒྱུ་དུས་ཀྱི་བླ་མ་རྡོ་རྗེ་སེམས་དཔའ་ཐོག་མ་དང་མཐའ་མ་མེད་པའི་ཀུན་ཏུ་བཟང་པོ་བརྟན་གཡོ་ཐམས་ཅད་ཀྱི་ཁྱབ་བདག་ཏུ་གྱུར་པ་དེ་ཉིད་ཐུགས་རྗེ་ཆེན་པོའི་དབང་གིས་ཁམས་གསུམ་གྱི་སྲིད་པ་ན་འགྲོ་བའི་དོན་མཛད་པའི་ཕྱིར། 
10-136
ཧཱུྃ་ཡིག་གིས་སྤྲུལ་པའི་འབྲས་བུའི་བླ་མ་རྡོ་རྗེ་འཆང་རིགས་ཐམས་ཅད་ཀྱི་བདག་པོ་ལྟ་བས་ཆོ་ག་མི་ཤེས་པར་མཛེས་པ་མཚན་དཔེས་སྤྲས་པའི་སྐུ་ཨིནྡྲ་ནི་ལ་བཅག་པའི་འཕྲོ་ལྟར་སྔོ་
བ། ཤིན་ཏུ་ཞི་ཞིང་འཛུམ་པ་རལ་པའི་ཟུར་ཕུད་ལ་སྣ་ཚོགས་རྡོ་རྗེ་དང་ཟླ་བ་ཕྱེད་པ་འཛིན་པ། རིན་པོ་ཆེའི་ཅོད་པན་ལ་སོགས་པའི་རྒྱན་དང་ཕྱག་རྒྱ་དྲུག་གིས་བརྒྱན་པ་དར་
གྱི་སྟོད་གཡོགས་དང་ཤམ་ཐབས་ཅན་རྡོ་རྗེ་སྙེམས་མ་དམར་མོ་མཛེས་སྡུག་གི་ཕུལ་དུ་བྱོན་པ་བཅུ་དྲུག་པའི་ལང་ཚོ་ཅན་ཕྱོགས་ཀྱི་གོས་མ་ཕྱག་རྒྱ་ལྔས་བརྒྱན་ཅིང་གྲི་ཐོད་འཛིན་པ་ལ་
རྡོ་རྗེ་དང་དྲིལ་བུ་འཛིན་པའི་ཕྱག་དག་གི་འཁྱུད་དེ་རྡོ་རྗེ་སྐྱིལ་མོ་ཀྲུང་གིས་འོད་ཀྱི་འཕྲེང་བ་འཁྲིགས་པའི་དབུས་ན་བཞུགས་པར་གྱུར།མདུན་གྱི་འདབ་མ་ནས་གཡས་སྐོར་དུ་གྱད་དང་། གླང་
པོ་ཆེ་དང་རྟ་དང་རྨ་བྱ་དང་། ཤང་ཤང་གིས་བཏེག་པའི་རིན་པོ་ཆེའི་ཁྲི་པད་ཉིའི་གདན་ལ་གཙོ་བོའི་སྐུ་ལས་འཕྲོས་པའི་ཨོཾ་ཡིག་ལས་རྣམ་པར་སྣང་མཛད་ཡབ་ཡུམ་དཀར་པོ། ཧཱུྃ་ལས་
མི་བསྐྱོད་པ་ཡབ་ཡུམ་སྔོན་པོ། ཏྲྃ་ལས་རིན་འབྱུང་ཡབ་ཡུམ་སེར་པོ། ཧྲིཿལས་འོད་དཔག་མེད་ཡབ་ཡུམ་དམར་པོ། ཨ་ལས་དོན་གྲུབ་ཡབ་ཡུམ་ལྗང་ཁུ། ཡབ་རྣམས་རྡོ་རྗེ་དང་དྲིལ་བུ་འཛིན་པས། 
10-137
ཡུམ་གྲི་ཐོད་ཐོགས་པ་ལ་འཁྱུད་པ་འཁོར་ལོས་སྒྱུར་བ་བཞིན་རྒྱན་ཐམས་ཅད་ཀྱིས་བརྒྱན་ནས་གཙོ་བོ་ལ་འདུད་པའི་ཚུལ་གྱིས་རྡོ་རྗེ་སྐྱིལ་མོ་ཀྲུང་གིས་བཞུགས་པའོ། །ལྷ་དེ་ཐམས་ཅད་ཀྱི་སྤྱི་
བོར་ཨོཾ། མགྲིན་པར་ཨཱཿཐུགས་ཀར་ཧཱུྃ། དེ་དག་ལས་འོད་འཕྲོས། དཔའ་བོ་དང་རྣལ་འབྱོར་མས་བསྐོར་བའི་ཡེ་ཤེས་ཀྱི་འཁོར་ལོ་སྟེང་གི་ནམ་མཁར་ཕེཾ་ཛཿཧཱུྃ་བྃ་ཧོཿདམ་ཚིག་གི་འཁོར་ལོ་དང་གཉིས་སུ་
མེད་པར་གྱུར། སྙིང་གར་ཉི་མའི་དཀྱིལ་འཁོར་ལ་ཧཱུྃ་བསྒོམས་ནས། ཨོཾ་བཛྲ་གུ་རུ་ཌཱ་ཀི་ནི་སིདྡྷ་ཧཱུྃ། ཞེས་བཟླ། མོས་ན་ཕྲ་ཐིག་གི་རྣལ་འབྱོར་ཀྱང་བསྒོམ། རྡོ་རྗེ་ལག་ཏུ་བླངས་ཏེ། ཧཱུྃ།
རྡོ་རྗེ་གསོར་བ་མཛེས་པ་སྟེ། དྲིལ་བུ་བླངས་ཏེ། ཨཱཿཤེས་རབ་ཐབས་ཀྱི་ཆོ་ག་འདི། །མཉམ་པར་སྦྱར་བའི་ཕྱག་རྒྱ་བྱས་ཏེ། ཨཱ་ལི་ཀཱ་ལི་མཉམ་སྦྱོར་བའི།། ཞེས་དམ་ཚིག་གསུམ་དྲན་པ་ནས་
གཟུང་། དེ་ནས་བགེགས་གཏོར་ཨོཾ་གྱིས་སྦྱངས། ཨཱཿཡིད་དང་མཐུན་པར་མང་པོར་སྤེལ། ཧཱུྃ་གིས་སྦར་བར་བསམས་ནས། ཨོཾ་ཨཱ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱདྱ་ནུཏྤནྣ་ཏྭཏ་ཨོཾ་ཨཱཿཧཱུྃ་ཕཊ་སྭཱ་ཧཱ། ཞེས་ལན་
གསུམ་གྱིས་བསྔོས། ཧཱུྃ། ང་ནི་དཔལ་ལྡན་སྙིང་རྗེའི་སྟོབས། ནས། ཨོཾ་སུཾ་བྷ་ནི་སུཾ་བྷ་ཧཱུྃ་ཧཱུྃ་ཕཊ། ཨོཾ་གྲྀ་ཧྞ་གྲྀ་ཧྞ་ཧཱུྃ་ཧཱུྃ་ཕཊ། ཨོཾ་གྲྀཧྞ་པ་ཡ་གྲྀཧྞ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོཿབྷ་ག་ཝན་བི་དྱ་རཱ་ཛ་ཧཱུྃ་ཧཱུྃ་ཕཊ། 
10-138
ཅེས་བསྐྲད། འོག་ཐམས་ཅད་རྡོ་རྗེའི་ས་གཞི། སྟེང་ཐམས་ཅད་རྡོ་རྗེའི་གུར་དང་བླ་བྲེ། ལོགས་ཐམས་ཅད་རྡོ་རྗེའི་རྭ་བ་དང་དྲ་བ། ཕྱི་རོལ་ཐམས་ཅད་མེ་རི་ཁ་དོག་རྣམ་པ་ལྔས་ཡོངས་
སུ་བསྐོར་བར་གྱུར། བཛྲ་རཀྵ་རཀྵ། ཨོཾ་སྭ་བྷཱ་ཝས་མཆོད་པ་རྣམས་བསངས། ཨོཾ་ཨཱཿབཛྲ་པུཥྤེ་ཧཱུྃ་སོགས་བརྗོད་ཅིང་ཀུན་ཏུ་བཟང་པོའི་མཆོད་སྤྲིན་དུ་བསམ། དེ་ནས་རས་བྲིས་སྭ་བྷཱ་ཝས་སྦྱངས། མདུན་གྱི་
ནམ་མཁར་སྟོང་པ་ཉིད་ཨེ་ཡིག་གི་རང་བཞིན་ནས། སྟེང་གི་ནམ་མཁའ་ཕེཾ་ཞེས་པའི་བར་རང་གི་སེམས་ཞེས་བཞག་པ་ཙམ་མིན་པ་སྔར་བཞིན་ལ་དེ་ནས་སྤོས་འཐུལ་ཞིང་དྲིལ་བུ་འཁྲོལ་ལ།
ཧཱུྃ། འགྲོ་མགོན་ཐུགས་རྗེའི་སྤྱན་ལྡན་རྣམས། བཛྲ་ཨཱཾ་ཀུ་ཤ་ཛཿབཛྲ་པཱ་ཤ་ཧྃའུ། བཛྲ་སྥོ་ཊ་བྃ། བཛྲ་ཨ་བེ་ཤ་ཡ་ཧོཿདམ་ཚིག་པ་དང་བསྲེ། ཐུགས་ཀའི་འོད་ཟེར་གྱིས་དབང་གི་ལྷ་ཚོགས་སྤྱན་
དྲངས། དེ་རྣམས་ཀྱིས་རིན་པོ་ཆེའི་བུམ་པ་བདུད་རྩིས་གང་བས་མདུན་བསྐྱེད་ཀྱི་ལྷ་ལ་དབང་བསྐུར། སྐུ་གང་། དྲི་མ་དག ཆུ་ལྷག་མ་སྤྱི་བོར་འཁྱིལ་བ་ལས་གཙོ་འཁོར་ཐམས་ཅད་ལ་རྡོ་རྗེ་
སེམས་དཔའ་དཀར་པོས་དབུ་བརྒྱན་པར་གྱུར། མགོན་པོ་འདིར་ནི་བྱོན་པ་ནས། བླ་མེད་བྱང་ཆུབ་མྱུར་ཐོབ་ཤོག། ཅེས་པའི་བར་གཞུང་བཞིན་མཎྜལ་སྔོན་དུ་འགྲོ་བས་དབང་བླང་། ཚོགས་བྱིན་གྱིས་རླབས་པ་ནས། 
10-139
ལྷག་མ་བཏང་བའི་བར་བྱས། བདག་བློ་གཏི་མུག་རྨོངས་པའི་དབང་གྱུར་ཏེ། སོགས་ཀྱིས་བཟོད་གསོལ་བྱས། དཀྱིལ་འཁོར་གྱི་ལྷ་བདག་ལ་བསྟིམ་པའམ་བྲིས་པ་སོགས་ཡིན་ན་དེ་ཉིད་ཀྱི་རྣམ་པར་བསྒྱུར། བཀྲ་
ཤིས་བརྗོད་པར་བྱའོ། །དེ་ལྟར་བླ་མ་རིགས་ཐམས་ཅད་ཀྱི་བདག་པོའི་དཀྱིལ་འཁོར་གྱི་འཁོར་ལོ་མཆོད་པའི་ལྷན་ཐབས་པདྨ་དཀར་པོས་མྱང་སྟོད་བློ་བདེའི་གཟིམས་ཁང་དུ་སྦྱར་བ་ཐམས་ཅད་ཀྱིས་རྡོ་རྗེ་
འཆང་ཆེན་པོ་གྲུབ་པར་གྱུར་ཅིག དཀྱིལ་འཁོར་འཁོར་ལོ་མ་ལུས་པའི། །གཙོ་བོའི་གནས་བཞུགས་སློབ་དཔོན་ནི། །སངས་རྒྱས་ཀུན་གྱིས་ཕྱག་མཛད་པར། །བཏུད་དེ་དབང་གི་ཆོ་ག་བཤད། །དབང་གི་ཁང་བུར་སྟེགས་
བུའི་ཁར། དྲིའི་ཆུ་དང་བདུད་རྩི་ལྔས་བཀང་བའི་བུམ་པ་དང་། ཅོད་པན་དར་དཔྱངས་དང་། རྡོ་རྗེ་དྲིལ་བུ་ལ་སོགས་པའི་དབང་རྫས། མཆོད་པའི་ཡོ་བྱད་ཚོགས་ཀྱི་མཆོད་པ་དང་བཅས་པ་ཚང་བར་
བཤམས་ནས། སློབ་དཔོན་བདག་ཉིད་སྤྲོ་བསྡུ་ལ་དམིགས་པའི་བར་གྱི་རྣལ་འབྱོར་ལ་ལྷག་པར་གནས་པའི་འོག་ཏུ། དྲིའི་ཆུས་སློབ་མ་བཀྲུས། མཎྜལ་ཕུལ་ཏེ། དཀྱིལ་འཁོར་དུ་འཇུག་པའི་ཕྱིར་ལན་གསུམ་དུ་གསོལ་
བ་འདི་གདབ་བོ།། སངས་རྒྱས་ཀུན་གྱི་རང་བཞིན་སྐུ། །སློབ་དཔོན་མགོན་ལ་སྐྱབས་སུ་མཆི། །གཙོ་བོ་མཁའ་འགྲོ་མར་བཅས་པའི། །ལྷ་རྣམས་ཀུན་ལ་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་གཞུག་ཏུ་གསོལ། །
10-140
ཨོཾ་ཨཱཿཧཱུྃ་གིས་མིག་དར་བཅིང་། ཨོཾ་སརྦ་ཡོ་ག་ཙིཏྟ་ཨུཏྤ་ཏཱ་ཡ་མི། བརྗོད་པས་རྣལ་འབྱོར་དུ་སེམས་བསྐྱེད་ལ། རྡོ་རྗེ་སྙིང་ཁར་བཞག་ནས། ཨོཾ་སུ་ར་ཏེ་ས་མ་ཡ་སྟཾ་ཧོ་སིདྡྷི་བཛྲ་
ཡ་ཐཱ་སུ་ཁཾ། ཨོཾ་ཨ་ཁཾ་ཝཱི་ར་ཧཱུྃ།སློབ་མ་དཀྱིལ་འཁོར་དུ་བཅུག་ནས། སློབ་དཔོན་གྱི་སྙིང་ཁ་ནས་སྐུ་གསུང་ཐུགས་དབྱེར་མི་ཕྱེད་པའི་ཡེ་ཤེས་འོད་ཟེར་གྱི་རྣམ་པ་སློབ་མའི་ལུས་
ལ་ཐིམ་པས། བླ་མ་དང་གཉིས་སུ་མེད་པར་གྱུར། གུ་གུལ་ཟླ་མཚན་འདྲེས་པ་བསྲེག་ཅིང་རོལ་མོའི་སྒྲ་དང་བཅས་པས། ཨོཾ་བཛྲ་ཨ་བེ་ཤཱ་ཡ་ཨཿཨ ཿརྡོ་རྗེ་སྤྱི་བོར་བཞག་ནས། ཏིཥྛ་བཛྲ་
བརྗོད། པྲ་ཏཱི་ཙྪ་བཛྲ་ཧོ ས་སློབ་དཔོན་གྱི་ལུས་ལ་མེ་ཏོག་དོར་བས། གནས་ལྔ་གང་དུ་ཕོག་པའི་རིགས་ངེས་པར་བྱའོ།། པྲ་ཏི་གྲྀཧྞ་སྟཾ་ས་ཏྭ་མ་ཧཱ་བ་ལ། ཞེས་པས་འཕྲེང་བ་
གཏད། ཨོཾ་ཨཱཿཧཱུྃ་གིས་མིག་དར་དབྱེ། རིག་པའི་དབང་ལྔའི་དོན་དུ་མཎྜལ་ཕུལ་ནས། བྱང་ཆུབ་རྡོ་རྗེས་སངས་རྒྱས་ལ། །མཆོད་སྦྱིན་ཇི་ལྟར་སྩལ་བ་ལྟར། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་
རྗེ་དེང་བདག་སྩོལ།། སློབ་མ་དང་དབང་རྫས་ཀྱི་བུམ་ཆུ་དྲིའི་ཆུས་བསངས། ཨོཾ་སྭ་བྷཱ་ཝ་བརྗོད་པས་སྦྱངས་ཏེ། པད་ཉིའི་གདན་ལ་ཧཱུྃ་ལས་མི་བསྐྱོད་རྡོ་རྗེ་འཆང་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ། 
10-141
རྒྱན་ཐམས་ཅད་ཀྱིས་བརྒྱན་ནས་སྐྱིལ་མོ་ཀྲུང་གིས་བཞུགས་པའི་ཐུགས་ཀའི་ས་བོན་ལས་འོད་འཕྲོས། ཡེ་ཤེས་པ་ཛཿཧཱུྃ་བྃ་ཧོཿདབང་རྫས་ཀྱི་མི་བསྐྱོད་པ་འོད་དུ་ཞུ་བ་བུམ་པའི་བདུད་རྩིར་གྱུར། དཀྱིལ་
འཁོར་གྱི་དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། རིག་པའི་ལྷ་མོ་རྣམས་ཀྱིས་དབང་བསྐུར། དབང་ཡུལ་གྱི་སེམས་དཔའ་སེམས་མས་བཀྲ་ཤིས་བརྗོད་ཅིང་མཆོད། ལས་དབང་གི་ཁྲོ་བོ་ཁྲོ་
མོས་བགེགས་སྐྲོད་པར་མོས་པས། རྡོ་རྗེ་ཆེན་པོས་དབང་བསྐུར་བ། །ཁམས་གསུམ་ཀུན་ཀྱིས་ཕྱག་བྱས་པ། སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་བཛྲ་ཨ་བྷི་ཥིཉྩ་མི།
བུམ་པས་དབང་བསྐུར་ཞིང་བུམ་ཆུ་འཐུང་དུ་གཞུག་གོ །ཅོད་པན་དང་སློབ་མ་བསངས་སྦྱངས། པད་ཉིའི་གདན་ལ་ཏྲྃ་ལས་རིན་འབྱུང་རྡོ་རྗེ་འཆང་སྐུ་མདོག་སེར་པོ་ནས། རིན་འབྱུང་འོད་དུ་ཞུ་བ་
ཅོད་པན་དུ་གྱུར་ནས་མོས་པས། རལ་པའི་ཐོར་ཚུགས་ཀྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུར་སྦྱིན་པར་བྱ། ཨོཾ་རཏྣ་ཨ་བྷི་ཥིཉྩ་
མི། མགོ་བོ་ལ་བསྐོན། རྡོ་རྗེ་དང་སློབ་མ་བསངས་སྦྱངས། པད་ཉིའི་གདན་ལ་ཧྲཱིཿལས་སྣང་མཐའ་རྡོ་རྗེ་འཆང་སྐུ་མདོག་དམར་པོ་ནས། སྣང་མཐའ་འོད་དུ་ཞུ་བའི་རྡོ་རྗེར་གྱུར། མོས་པས། སངས་རྒྱས་ཀུན་གྱི་རྡོ་རྗེའི་དབང་། 
10-142
དེ་རིང་ཁྱོད་ལ་བསྐུར་བར་བྱ། སངས་རྒྱས་ཀུན་ནས་རབ་གྲུབ་ཕྱིར། རྡོ་རྗེ་འདི་ནི་ཁྱོད་ཀྱིས་ལོང་། ཨོཾ་པདྨ་ཨ་བྷི་ཥིཉྩ་མི། ལག་པ་གཡས་པར་གཏད། དྲིལ་བུ་དང་སློབ་མ་བསངས་སྦྱངས། པད་
ཉིའི་གདན་ལ་ཨ་ལས་དོན་གྲུབ་རྡོ་རྗེ་འཆང་སྐུ་མདོག་ལྗང་ཁ་ནས། །དོན་གྲུབ་འོད་དུ་ཞུ་བའི་དྲིལ་བུར་གྱུར། སངས་རྒྱས་ཀུན་གྱི་དྲིལ་བུའི་དབང་། དེ་རིང་ཁྱོད་ལ་བསྐུར་བར་བྱ། །སངས་རྒྱས་
ཀུན་ཏུ་རབ་གྲུབ་ཕྱིར། །དྲིལ་བུ་འདི་ནི་ཁྱོད་ཀྱིས་ལོང་། ཨོཾ་ཀརྨ་ཨ་བྷི་ཤིཉྩ་མི། གཡོན་པར་གཏད། སློབ་མ་བསངས་སྦྱངས། པད་ཉིའི་གདན་ལ་ཨོཾ་ལས་རྣམ་སྣང་རྡོ་རྗེ་འཆང་སྐུ་མདོག་དཀར་པོ།།
མོས་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མི། བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་དཔལ།། མིང་བཏགས།དེ་རྣམས་ཀྱིས་ཕུང་ཁམས་ལྔའི་དྲི་མ་སྦྱངས་ཤིང་། མ་རིག་པ་ལྔ་ལས་བཟློག་
ནས་རིག་པའི་ཡེ་ཤེས་ལྔ་བསྐྱེད་པས་རིག་པའི་དབང་ཞེས་བྱའོ། །མཎྜལ་ཕུལ། དཔའ་བོ་ཆེན་པོ་མི་ལྡོག་པའི། དབང་བསྐུར་བ་ནི་བདག་ལ་སྩོལ། སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་བདག་ནི་
སློབ་དཔོན་འགྱུར།། སློབ་མ་བསངས་སྦྱངས། དཀྱིལ་འཁོར་གྱི་ཤར་ཁྱམས་སུ་སེང་གེས་བཏེག་པའི་ཁྲི་ལ་རྡོ་རྗེ་འཆང་རིགས་ཐམས་ཅད་ཀྱི་བདག་པོ་ནས་གྱུར་གྱི་བར་སྒོམ་དུ་བཅུག་ནས། རྡོ་རྗེ་རབ་གནས་རྡོ་རྗེ་ཉིད། །
10-143
ཆེ་དང་དྲིལ་བུ་ཆེན་པོ་བཟུང་། །དེ་རིང་རྡོ་རྗེ་སློབ་དཔོན་འགྱུར། །སློབ་མ་བསྡུ་བ་ཉིད་དུ་གྱིས། རྡོ་རྗེ་ཐུགས་ཀྱི་དམ་ཚིག དྲིལ་བུ་གསུང་གི་དམ་ཚིག ཕྱག་རྒྱ་སྐུའི་དམ་ཚིག་སྟེ་བརྟུལ་
ཞུགས་དམ་ཚིག་གསུམ་དང་མི་འབྲལ་བའི་སྒོ་ནས་སེམས་ཅན་གྱི་དོན་གྱིས་ཤིག །དེ་རྣམས་ཀྱིས་ལུས་ཀྱི་དྲི་མ་དག །བུམ་པའི་དབང་ཐོབ། ལམ་བསྐྱེད་རིམ་སྒོམ་པ་ལ་དབང་། འབྲས་བུ་སྐུ་རྡོ་རྗེ་
སྤྲུལ་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ།། གསང་དབང་གི་དོན་དུ་མཎྜལ་ཕུལ། ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །སྒྱུ་འཕྲུལ་དྲ་བ་མངོན་རྫོགས་
པའི། །བྱང་ཆུབ་ཅི་ནས་བདག་ཐོབ་མཛོད། །ཨོཾ་ཨཱཿཧཱུྃ་གིས་མིག་དར་བཅིང་། བླ་མ་རྡོ་རྗེ་འཆང་ཡབ་ཡུམ་སྙོམས་པར་ཞུགས་པས་སྐུ་གསུང་ཐུགས་ཡེ་ཤེས་རྡོ་རྗེའི་ལྷ་ཚོགས་ཐམས་ཅད་ཞུ་བའི་བདུད་རྩི་
བྱང་ཆུབ་ཀྱི་སེམས་དཀར་དམར་འདྲེས་པའི་ཐིག་ལེ་པདྨར་བབས་པ་ལྕེས་བླངས་པར་མོས་ཏེ། ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་རྣམས་དབང་བསྐུར་ལྟར། །དེ་བཞིན་བྱང་ཆུབ་སེམས་རྒྱུན་གྱིས། །དེ་
རིང་ཁྱོད་ལ་དབང་སྐུར་རོ། །ཨ་ཧོ་མཧཱ་སུ་ཁ་ཞེས་བརྗོད། མིག་དར་ཕྱེ། དེས་ངག་གི་དྲི་མ་དག གསང་བའི་དབང་ཐོབ། ལམ་རྩ་རླུང་ཐིག་ལེ་བསྒོམས་པ་ལ་དབང་། འབྲས་བུ་གསུང་རྡོ་རྗེ་ལོངས་སྤྱོད་རྫོགས་པའི་སྐུ་ཐོབ་པའི་སྐལ་བ་ཅན་དུ་བྱས་པ་ཡིན་ནོ།།
10-144
དབང་གསུམ་པའི་དོན་དུ་མཎྜལ། གསོལ་གདབ། མིག་དར་བཅིང་བ་སྔ་མ་བཞིན་བྱས། ནས། སློབ་མ་རྡོ་རྗེ་འཆང་ཆེན་པོར་གསལ་བ་ལ། བླ་མས་རིག་མ་ཡོངས་སུ་དག་པའི་རྡོ་རྗེ་སྙེམས་མ་སློབ་
མ་ལ་སྤྱིན་ཏེ། ལྷ་མོ་དགའ་སྦྱིན་གནས་སྦྱིན་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །ཕྱག་རྒྱ་དེ་དང་སྙོམས་པར་ཞུགས་པས་
དགའ་བ་དང་མཆོག་དགའི་མཐར། ལྷན་ཅིག་སྐྱེས་པའི་སྐད་ཅིག་མ་སོ་སོ་རང་གིས་རིག་པར་བྱའོ། མིག་དར་ཕྱེ། ཡིད་ཀྱི་དྲི་མ་དག ཤེས་རབ་ཡེ་ཤེས་ཀྱི་དབང་ཐོབ། ཕོ་ཉའི་ལམ་བསྒོམ་པ་
ལ་དབང་། འབྲས་བུ་ཐུགས་རྡོ་རྗེ་ཆོས་ཀྱི་སྐུ་ཐོབ་པའི་སྐལ་བ་ཅན་དུ་བྱས་པའོ།། དབང་བཞི་པའི་དོན་དུ་མཎྜལ་ཕུལ། གསོལ་བ་གདབ། མིག་དར་བཅིངས་ནས། ཡེ་ཤེས་འདི་ནི་ཆེས་ཕྲ་ཞིང་། རྡོ་
རྗེ་ནམ་མཁའི་དཀྱིལ་ལྟ་བུ། །རྡུལ་བྲལ་མཐར་ཕྱིན་ཞི་བ་ཉིད། །ཁྱོད་རང་ཡང་ནི་དེ་ཡི་ཕ།། ཞེས་དབང་བཞི་པའི་ཡེ་ཤེས་བཤད། མིག་དར་ཕྱེ། ལུས་ངག་ཡིད་ཐ་དད་དུ་འཛིན་པའི་དྲི་མ་
དག དབང་བཞི་པ་ཐོབ། ལམ་ཕྱག་རྒྱ་ཆེན་པོ་བསྒོམ་པ་ལ་དབང་། འབྲས་བུ་ཡེ་ཤེས་རྡོ་རྗེ་ངོ་བོ་ཉིད་ཀྱི་སྐུ་ཐོབ་པའི་སྐལ་བ་ཅན་དུ་བྱས་པའོ།། དེ་ནས། ཁྱོད་ཀྱིས་སྲོག་ཆགས་གསད་པར་བྱ། 
10-145
རྫུན་གྱི་ཚིག་ཀྱང་སྨྲ་བར་བྱ། །མ་བྱིན་པ་ཡང་ཁྱོད་ཀྱིས་ལོང་། །གཞན་གྱི་བུད་མེད་བསྟེན་པར་གྱིས་ཞེས་དམ་ཚིག་དབོག གཏང་རག་གི་མཎྜལ་ཕུལ་ནས། བཟའ་བཏུང་བྱིན་གྱིས་རླབས་ནས། བདུད་རྩི་སྔོན་
དུ་འགྲོ་བས་ཤ་ལ་སོགས་པའི་བཟའ་བ་དང་བཏུང་བ་ལོངས་སྤྱོད་དེ། ལྷག་གཏོར་བཏང་། དཀྱིལ་འཁོར་བསྡུས་ནས་དག་པ་གསུམ་པའི་རྣལ་འབྱོར་ལ་གནས་པར་བྱའོ། །སློབ་མ་ཀུན་སྤངས་ལ་ཐམས་ཅད་ཚིག་
ཙམ་གྱིས་སྦྱིན་པས་རུང་ངོ་། །བླ་མ་དམ་པའི་ཞལ་སྐྱིན་པདྨ་དཀར་པོས་ཁོ་མཐིང་ལྷ་ཁང་དུ་སྦྱར་བ་དགེ་ལེགས་རྒྱས་པར་གྱུར་ཅིག། །། བདག་བསྐྱེད་མདུན་བསྐྱེད་མཆོད་བསྟོད་རྫོགས་པའི་བར་བསྒྲུབས་ནས་བུམ་
བསྐྱེད་ལ་འཇུག་ཅིང་། དེ་ཡང་རྣམ་རྒྱལ་དང་དེའི་སྟེང་དུ་རྣམ་རྒྱལ་ཆེན་པོ་ཐོད་པའམ་དུང་ཆོས་ལས་ཐམས་ཅད་པའི་བུམ་པ། དང་པོ་གཉིས་སུ་ཕྱི་ཡེ་ཤེས་ཀྱི་བུམ་པ་དང་ཐོད་པ་མཚན་
ཉིད་ཐམས་ཅད་ཚང་བ་ནང་ཡངས་པའི་འོག་གི་ཆ་བདུད་རྩིའི་རྒྱ་མཚོ། དེའི་དབུས་སུ་པདྨའི་སྡོང་པོ་ལ་ལྷ་ཚོགས་མདུན་སྐྱེད་བཞིན་བསྐྱེད་པ་དང་རྒྱས་བཏབ་ཀྱི་བར་བྱ། དེ་ནས་ཡན་ལག་བརྒྱད་
ལྡན་སོགས་ཀྱིས་མཆོད་བསྟོད། བཟླས་པས་བསྐུལ་ཏེ་སྔགས་གཟུངས་ཐག་ལ་འཁྲིལ་བ། རྣམ་རྒྱལ་ཆེན་པོའི་ལྷའི་ཐུགས་ཁར་ཕོག དེ་འོད་དུ་ཞུ་བའི་རྒྱུན་བུམ་པའི་ལྷ་ལ་ཐིམ་པས་བདུད་རྩིའི་རང་བཞིན་དུ་ཞུ་བ་དང་། ལས་ཐམས་ཅད་པ་ལ་ནི་ཞལ་བཞི་པའི་སྔགས་བརྒྱ་རྩ་བརྒྱད་བཟླས་པས་ཆོག་གོ། །།བཀྲ་ཤིས།། །།


目录
བླ་མ་མཆོད་པའི་ལྷན་ཐབས་དབང་ཆོག་དང་བཅས་པ་བཞུགས་སོ།།